عزمي مجاهد عن «تسريب الضابط أشرف»: «ولا يهمنا» (فيديو)

عزمي مجاهد عن «تسريب الضابط أشرف»: «ولا يهمنا» (فيديو)

نفى عزمى مجاهد، صحة ما نشرته صحيفة «نيويورك تايمز» الأمريكية، بشأن تلقيه وآخرين اتصالات هاتفية من ضابط بالمخابرات لتوجيههم بالتمهيد للرأى العام بأن القدس ليست عربية. وقال مجاهد فى مداخلة هاتفية لبرنامج «على مسؤوليتى» الذى يقدمه الإعلامى أحمد موسى، على فضائية «صدى البلد»: «أنا راجل كابتن مصر مثلت مصر فى أولمبيات وكأس عالم أكثر من خمس ست مرات، وبلدنا كرمتنا بأربع أوسمة من الرؤساء، إحنا محدش يزايد على وطنيتنا، إحنا بنشتغل من وازع ضميرنا وحبنا لبلدنا واحترامنا لبلدنا ومؤسسات بلدنا ورئيسنا وجيشنا وشرطتنا، إحنا بنحترم هذا العمل، وإحنا بنشتغل فى قناة محترمة وطنية، بنحب بلدنا، إحنا لا نزايد على بلدنا ولا حد هيجبرنا نزايد على بلدنا».

وبشأن المكالمة قال: «أنا كل يوم بيجيلى بدل المكالمة 100، اللى عنده مشكلة واللى عنده رأى، بمشى فى الشارع آخد آراء الناس وبسمع الناس وبنشرحلهم ونصححلهم المفاهيم وحاجات كتيرة، أولًا هذا الاسم غير متواجد، وأنا بحيى وأثمن دور الأستاذ ضياء رشوان لأنه رد رد شافى، وأنا أتدى لو كان فيه حد بهذا الاسم فى المخابرات أو الأمن الوطنى، أى حد بيتكلم بنرد عليه لكن مفيش حد بيوجهنا، إحنا بنسند أجهزتنا يافندم، واقفين ورا أجهزتنا المحترمة ودا شرف، وبعدين احنا بنحترم بلدنا ومؤسسات بلدنا ويمكن آخر حلقتين ليا قلت إننا عندنا أمن وطني وعندنا مخابرات وسام على صدر كل مصرى محترم، فالناس لا بتوجه ولا بتقول ولا بتعيد، إحنا اللى بنساند وإحنا اللى بندعم».

وأضاف: «لو فيه عندنا أجهزة بتوجه الإعلام مكانوش سابوا اللى جابت وائل غنيم واللى جابت الرئيس الأمريكى واللى باعوا البلد، شغالين ومحدش بيقولهم انتوا فين، بيعملوا أعياد ميلاد وبيتفسحوا وبيصيفوا فى باريس وإيطاليا، إحنا نختلف، هما بيحاولوا يكسروا الإعلام الوطنى المحترم، إحنا بنشتغل فى مؤسسات محترمة». واستطرد قائلًا: «إحنا بنتعرض لحرب، هما عايزين يكسروا الإعلام الوطنى الشريف، ومش هيقدروا أبدًا، وإحنا على الدرب سائرين ورا بلدنا، ومش هنسيب بلدنا اللى وقفت على حيلها، ولا يهمنا لو عندهم تسجيلات يذيعوا، إحنا عمرنا لا نسئ لبلدنا اللى خيرها علينا، يقولوا اللى يقولوه».

وتابع: «هما بيعملوا لكلام دا عشان 25 يناير قرب، أنا بقولهم 25 يناير عيد الشرطة، الشعب المصرى كله هيحتفل بشرطته، اللى قدمتله خدمات جليلة ومسانداه، وبياخدوا الرصاص فى صدرهم زى ما خدوه فى الواحات كدا عشان احنا نعيش فى أمن وأمان، 25 يناير جميع محافظات مصر بعون الله هتحتفل بأعياد الشرطة، هنحتفل برجالتنا المحترمين».

التحرير